MHLELI: Ngisika elijikayo ngomdlalo wamanqamu womqhudelwano weMTN8, ozoba phakathi kwezikaMagebhula, noSuthu. Ngiphinda amazwi ami engawasho ngaphambi komlenze wesibili, athi iqembu elizonqoba phakathi kwePirates neDowns, yilo elizoba yizingqwele zeMTN 8. Ngisamile emazwini ami.
Into edala ngisho kanje ukuthi iKaizer Chiefs ibingakulungele ukuya kweyamanqamu. AmaZulu angenile kweyamanqamu kepha emdlalweni wabo neChiefs badlule ngegoli abalishaye ekuhambeni kepha izinga labo lokudlala liyehla kunokuthi lenyuke. Lokho ngikususela emdlalweni wabo ne-Orlando Pirates ophele zibambene ngo 1-1. AmaZulu adlala ibhola elihle ebhekene nePirates, uma singakhuluma iqiniso kwakufanele kushintshwe ehamba phambili aMaZulu ngamagoli amathathu, eqandeni. Umuntu okwakumele aqobele lawo magoli nguMajoro, awageja amagoli uma ngingalibali leli alibeka enethini laphikwa, kwathiwa isikhindi besishawa umoya.
Bengizitshela ukuthi uSuthu luzoshaya amagoli angaphezu kwamathathu emlenzeni wesibili eMoses Mabhida, ngendlela olwalubhincisela nxanye ngayo iPirates phakathi nesonto. Ngiyavuma adlulile kepha ibhola alidlale emlenzeni wesibili belingagculisi, ubungeke usho ukuthi adlalela ekhaya. Engikubone emdlalweni wango-Okthoba 26, bebhekene neMarumo Gallants, kwenze ngabona ukuthi liyehla izinga labo lokudlala. Bebelicinga ngethoshi ibhola emdlalweni wabo neGallants. Ukube iGallants ibilikhahlelela epalini ngabe sikhuluma okunye namuhla. Manje nabo bebephaselana kuze kweqe ngisho ku-18 yadi.
Kanti noVeli Mothwa ubenamaphutha emdlalweni wabo weMarumo. Uma AmaZulu ezodlala leli bhola asikhombise lona etholene neMarumo, angiwaboni enqoba iPirates, ngoNovemba 5. Ngibuka nemidlalo asebeyidlalile benganqobi nowodwa. Uma ngingaphosisi idlulile kwemihlanu noma eyisithupha kudlanganisa neyeMTN 8. Angifuni ukukhuluma iphutha, aMaZulu analo lonke uhlobo lomdlali futhi anabagadli abanohlonze kodwa muva nje, imiphumela iyawaphika. Yingakho sebehlele ezansi kwilog. Bayiqale kahle isizini kangangoba bake baqhwakela phezulu kwilog kepha namuhla bazithola besendaweni yesishagalombili.
UManzini (uSandile Zungu) ulande uBrendon Truter, ekubeni embone kahle kwiMoroka Swallows edlala ngokulingana ukwedlula wonke amaqembu akwiPSL. Lo Romain " Fohloza" Foltz ngimbona ezowuzikisa umkhumbi woSuthu. Ungalanda umqeqeshi ongakaze anqobe neyodwa indebe lapho esuka khona. Lapha eMzansi akakanqobi nowodwa umdlalo, ngibala esekwiMarumo Gallants. Kepha uthembe ukuthi lowo mqeqeshi uzowina indebe noma uzoshaya Pirates? Mina angisilo iphanta kodwa kulokhu ngizobheja nginike eZimnyama. Soyicela ivuthiwe ngoFohloza.
Sbu Mhlanga
EMTUBA
Related Topics: