Isithombe. ©Muzi Ntombela/BackpagePix
EYOKUSHIYWA ngaphandle kwiBafana Bafana kwabanye babadlali abasefomini iphathisa ngekhanda iqubule nombuzo othi engabe iyozala nkomoni ngekusasa laleli qembu lesizwe.
Izinqumo zomqeqeshi weBafana, uHugo Broos, zibukeka zizomumbela igodi ngokumdalela isigcwagcwa kubadlali nakubaqeqeshi bePremiership.
Ukuboshelwa kwabadlali abancane abanekhono kuhle, kodwa okufanele akwazi uBroos wukuthi eqenjini lesizwe akusiyona indawo yabadlali abayizimfundamakhwela. Yindawo yezingwazi ezaziyo ukuthi ziyolwela isithunzi sezwe.
Lapha eNingizimu Afrika ligaya ngomunye umhlathi, uma kuqhathaniswa nakwamanye amazwe aseke anqoba iNdebe yoMhlaba.
ESpain uSergio Busquets (33) noSergio Ramos (35) basaboshelwa eqenjini lesizwe lakhona, e-Argentina uMessi (34) usabizwa, kanjalo noRonaldo (37) naye kwelasePortugal (37) akashiywa ngaphandle.
URobert Lewandowski (33) ogijima kwiBayern Munich useyisethenjwa sePoland.
Lapha abadlali abasefomini nabaneminyaka engaphezu kwewu-30 babizwa ngamakhehla, kodwa amanye amazwe ahlonishwayo kunobhutshuzwayo ahlabana ngabo. Ungamshiya kanjani u-Andile Jali (31) noThemba Zwane (32) abawumgogodla kwiMamelodi Sundowns, okumanje isethubeni lokugila izimanga kwiCaf Champions League nakwiPremiership? Kodwa uncamele ukuthatha uThabang Monare (32) iqembu lakhe elidonsa kanzima kweyeligi.
Indlela okwenzeka ngayo iwukubukela phansi isizwe sonkana. Okufanele kukhunjulwe ngabaholi beSafa wukuthi abantu bakuleli abathule ngoba beyiziphukuphuku, wukuthi nje baswele amandla okuthi bangasiguqula kanjani isimo.
Siyohlale singomvakwezinye kwamanye amazwe uma abaqeqeshi esibaqashile bezofika bazenzele umathanda.
Uma iBafana iqhubeka nokushaya udaka, abaxhasi bazohambela kude nayo. Kodwa ukudlondlobala kwayo kuyoyakhela isibunge abaxhasi babangisane ngayo.
Related Topics: