UVUSUMUZI Vilakazi osule isigubhukane kuMaZulu FC ukuze ayozama ukuxazulula izinkinga abhekene nazo ebeseziqala ukukupakela emsebenizini wakhe Isithombe: X
Umengameli waMaZulu FC, uSandile Zungu, uveza ukuthi babone kufanele bamkhulule umqeqeshi uVusumuzi Vilakazi ukuze akwazi ukuyobhekana ezimkhungethe nobesekucaca ukuthi zizokapakela emsebenzini wakhe.
UZungu ubekhuluma ohlelweni lwezemidlalo kuKhozi FM ngemuva kokwesula isigubhukane kukaVilakazi emsebenzini wakhe wokuqeqesha ngokubambisana no-Arthur Zwane leli qembu laseMbelebeleni.
UVilakazi ukhushulelwe esikimini esikhulu soSuthu ngo-Okthoba esuka eqenjini lenjejane elidlala kwiDStv Diski Challenge ezojoyina uZwane obesuka kwiKaizer Chiefs.
“Uhlambulukile kithina singabaphathi boSuthu, eveza ukuthi ubhekene nezinkinga acabanga ukuthi seziqala ukumphazamisa emsebenzini wakhe.
Wasinxusa ukuthi asimdedele, abhekane nazo ngqo lezi zinkinga zakhe ukuze abe ngumuntu ongcono, iqembu lethu loSuthu lingaphazamiseki kulo mgqigqo elikuwona njengamanje. Sibe nemihlangano ngeSonto ngemuva komdlalo wangoMgqibelo (neMagesi FC), nangoMsombuluko wahlangana no-Director of Football eqenjini, uPedro Dias, sabe sesivumelana ukuthi asimvumele kulesi sicelo sakhe sokuthi azibeke phansi izintambo, kuqhutshekwe nomsebenzi.
Simfisela inhlanhla ekubhekaneni namadimoni akhe, adlule kulesi simo abhekane naso, abe ngumuntu ongcono,” kusho uZungu.
Ukugcizelele ukuthi ayikho ingcindezi abayifake kulo mqeqeshi, wawaphika namahlebezi okuthi kukhona bese kukhona ukungaboni ngaso linye phakathi kukaVilakazi, Zwane, noDias ongumqondisi wezokuqeqesha.
UZwane kulindeleke ahlale noSiboniso Vilakazi emdlalweni wangeSonto weBetway Premiership AmaZulu azowudlala neCape Town City, eKing Zwelithini Stadium, eMlaza, ngo-3.30 ntambama.
Related Topics: