UMGADLI weMamelodi Sundowns, uPeter Shalulile, usethubeni lokuphula irekhodi lamagoli ebholeni elikhokhelayo eMzansi Isithombe: BACKPAGEPIX
EMUVA kweminyaka eyishumi egijima kwiPremier Soccer League (PSL), umgadli weMamelodi Sundowns, uPeter Shalulile, usethubeni lokungena komunye umlando ebholeni laseMzansi.
UShalulile (31) waseNamibia, wafika eNingizimu Afrika ezodlalela iHighlands Park egcine idayiselwe isikhulu se-TS Galaxy, uTim Sukazi, ngo-2020. Emuva kwalokho wathengwa yiMamelodi Sundowns aseyisize yawina izicoco ezahlukene okukhona kuzona eseBetway Premiership amahlandla amathathu.
Nakuba uShalulile afika kuleli ngo-2015 engazelwa lutho kodwa usephenduke omunye wabagadli abesatshwayo ngenxa yejubane nobuchule bokushaya inethi. Uwine umklomelo womgadli oshaye amagoli amaningi, iLesley Manyathela Golden Boot, amahlandla amathathu. Uwudle ngesizini yakhe yokugcina kwiHighlands Park eshaya amagoli angu-16 ngesizini ka-2019/2020 ewuhlukaniselana noGabadinho Mhango waseMalawi. Ukuphindile lokho amasizini elandelana esekwiSundowns ehlohla angu-23 ngesizini ka-2021/2022 nangu-12 ngesizini ka-2022/2023. Ngalokhu, uqophe umlando wokuba ngumgadli ohlabane ngalo mklomelo kathathu. Ulandelwa nguMbesuma owawudla amahlandla amabili okungesizini ka-2004/2005 eshaya angu-25 kwiKaizer Chiefs nangeka-2015/2016 eshayela iMpumalanga Black Aces angu-14.
Manje, uShalulile usethubeni lokungena emlandweni wokuba ngumshayimagoli ohamba phambili emlandweni wePSL okuyirekhodi eliphethwe nguSiyabonga Nomvethe. Useshaye inethi amahlandla angu-125 emiqhudelwaneni eyahlukene ayidlalile. Usele ngamagoli amane kuNomvethe osewaphanyeka amakhokho emgibeni, ophethe irekhodi lamagoli angu-129. Amagoli amabili kaShalulile awashaye ngempelasonto edlule ngesikhathi iSundowns ixebula iLamontville Golden Arrows, amsondeze kakhulu ekutheni anikwe lo mqhele. KwiSundowns useshaye angu-98, kanti kwiHighlands washaya angu-27.
Usevele uwaphulile amarekhodi abanye abagadli abasemlandweni wokushaya inethi amahlandla angaphezu kuka-100 kwiPSL okukhona kubona uMabhuti Khenyeza (110), Bradley Grobler (113), Daniel Mudau (110), Manuel Bucuane (104) noCollins Mbesuma (103).
UNomvethe ubeke irekhodi lamagoli angu-129 edlalela amaqembu ahlukene okukhona kuwona i-African Wanderers, Kaizer Chiefs, Orlando Pirates, Moroka Swallows ayijoyine esebuya phesheya naMaZulu ayeke ibhola esedlala kuwona. Kungenzeka kuphele inyanga, sekukhonya uShalulile kwabaphambili ngamagoli kwiPSL.
Related Topics: