UMSAWENKOSI Mtolo (ohlezi) noThabani Msiya abavivela ukuyovikela isicoco sabo seNon-Stop Dusi Canoe Marathon ezoba ngoMashi 7, kusukwa eMgungundlovu kubhekwe eThekwini Isithombe: X
UMSAWAKHE Mtolo, olale isihlanu kwiDusi Canoe Marathon ngempelasonto edlule, unethemba lokuvikela isicoco seNon-Stop Dusi Canoe Marathon asesinqobe amahlandla amahlanu benozakwabo, uThabani Msiya.
UMtolo ulale isihlanu kwiDusi enqotshwe ngu-Andy Birkett ngeledlule. UMsiya ulale endaweni ka-11 kulo mjaho wezinsuku ezintathu osuke eMgungundlovu, waphelela eThekwini.
UMtolo noMsiya sebevivela ukugwedla ndawonye (K2) kwi-Non Stop Dusi yebanga lika-108km ezoba ngoMashi 7. Lo mjaho uzosuka eBishopstowe Hall, eMgungundlovu, uphele eKingfisher Canoe Club, eThekwini.
INon-Stop kayifani neDusi Marathon egwedlwa izinsuku ezintathu njengoba yona iwusuku.
Njengoba kwiDusi Marathon kusalokhu kukhonye uBirkett, kwiNon-Stop uMtolo noMasiya yibona abayizingqwele.
Nyakenye badle umhlanganiso ngesikhathi esingu-7:44:24. Balandelwe nguMatthew Fenn obegwedla yedwa ngesikhathi esingu-8:08:12, isithathu kwaba nguBenjamini Mnonintshi egwedla noWongama Makasi ngesikhathi esingu-8:16:43.
“Yize kuyithina ompetha abavikela isicoco seNon-Stop kodwa lokho akusho ukuthi sizoya kulo mjaho sikuthwele emakhanda ukuthi siyosizivikela kalula ngoba lokho kungenza ukuthi sithathe izinto kalula bese sihlulwa ngabanye abazobe bezimisele kakhulu kunathi.
Kodwa kuyisifiso sethu impela ukuthi siphinde siwunqobe lo mjaho okwehlandla lesithupha noma sazi ukuthi ngeke kube lula,” kusho uMtolo.
“Imfihlo yokwenza kahle kwethu kwiNon-Stop wukuwuqonda kahle umjaho nokusebenzisa ngendlela amasu esizihlelele wona ngaphandle kokutatazela nokuqala ngegiya eliphezulu kungenasidingo.
Singabagwedli abayithandayo imijaho enenselelo njengoba phakathi nonyaka siphinde sigwedle komunye umjaho waseKapa, iBerg River Canoe Marathon, webanga lika-240k yaseKapa.”
UMtolo (27) waKwaNyavu, eMkhambathini, nyakenye ulale isibili kwi-K2 kwiDusi Marathon egwedla noSbonelo Khwela. Ngo-2023 walala isibili kwi-K1 esezithendeni zikaBirkett okuyizimpawu zokudlondlobala kulo mdlalo wokugwedla ngezikebhe.
KwiDusi yanonyaka ubeyibambe nomnewabo, uSandile, olale isithupha.
Related Topics: