INSEPHE yomgijimi, uMncedisi Mkhize, ongomunye wabagijimi abaqavile abazobamba iqhaza kwiMfundo Arnold Lushaba Half Marathon yebanga lika-21km, eMzumbe, ngeSonto Isithombe: SITHUNYELWE
ABAHLELI beMfundo Arnold Lushaba Half Marathon banesifiso sokubona lo mjaho ukhula ufinyelela ezingeni lomjaho wokwenza izikhathi zokuzibekisela indawo emijahweni emikhulu okubalwa kuyo i-Two Oceans Marathon neComrades Marathon.
Lokhu kushiwo ngu-Emmanuel Lushaba ongusihlalo weMzumbe Development Athletics Club engabahleli balo mjaho ohlanganisa ibanga lika-21km no-10km, ozogijinywa ngeSonto ngo-6 ekuseni, usukela eSibanini Sports Ground, eMzumbe, uphelele khona kule nkundla.
Lo mjaho uqanjwe ngowayeyimeya kaMasipala waseMzumbe, uMfundo Lushaba, owashona engozini yemoto ngo-2007, engakaliqedi ihlandla lakhe njengemeya yakulo masipala.
Nonyaka uzobe ugijinywa okwehlandla lesine kusukeka ngo-2022, uqala ukugijinywa ngokugcwele njenge-half marathon.
“Njengabasunguli nabahleli balo mjaho kuyasithokozisa ukuwubona ukhombisa ukukhula, nesinethemba lokuthi kowanonyaka sizobona isibalo sabagijimi esithe xaxa kunangonyaka odlule.
Njengoba sawuqala njenge-fun run, manje sewuyi-half marathon, inhloso yethu enkulu wukuthi ukhule uze ufinyelele ezingeni lokuba yi-marathon ngokugcwele, abagijimi ababamba iqhaza kuwona ze bakwazi ukuwusebenzisa ukuzibekisela indawo emijahweni emikhulu enjengeTwo Oceans neComrades,” kusho uLushaba.
Izindawo zasemakhaya zisasilele kwingqalasizinda namathuba okuzithuthukisa kwezemidlalo, okuyingakho sifisa kakhulu ukuwubona lo mjaho ukhula udlondlobala ufika ezingeni leminye ekhona esifundazweni, nentsha yakule ndawo ithole ithuba lokuveza ikhono layo.”
Phakathi kwabagijimi ababhekiwe emjahweni wakulo nyaka, kubalwa uNkululeko Mgubhela okunguyena odle umhlanganiso nyakenye ngesikhathi esingu-01:07:37, uYanga Malusi owala isibili ngo-01:08:40, noSonwabo Shezi owalala isithathu.
Kanti kwabesifazane kubhekwe uMalineo Mahloko owadla umhlanganiso ngesikhathi esingu-01:24:44, kube ngu-Andisiwe Njunguza owalala isibili ngo-01:27:59, noNonhle Dlamini owala isithathu.
Ngaphandle kwalaba bagijimi, owakulo nyaka ungenelwe yinsephe, uMncedisi Mkhize, osegijime iComrades Marathon amahlandla angu-19 wazuza amagolide ayisikhombisa. UMkhize (44), odabuka eMthwalume, ngo-2007 walala isithathu kwiComrades ngesikhathi esingu-5:32:50 ehlezi ezithendeni abagijimi baseRussia, uGrigory Murzin owalala isibili noLeonid Shvetsov owadla umhlanganiso.
Umgijimi ozodla umhlanganiso ku-21km uzohlomula ngo-R10 000, isibili kube ngu-R7 000, isithathu kube ngu-R4000.
Ku-10km oshaye intambo kuqala uzothola u-R4 000, isibili kube ngu-R2 500, isithathu kube ngu-R1 000.
Related Topics: