UKAGISO RABADA ngomunye wabashwibi bakuleli okubhekwe ukuthi banqobe abadlali be-Australia uma sebebhekene kowe-ICC Champions Trophy kusasa Isithombe: AFP
UMSHWIBI weqembu lesizwe lekhilikithi labesilisa, uKagiso Rabada, uyethemba ukuthi ngeke babanjwe amatata uma sebebhekene ne-Australia emdlalweni wesibili we-ICC Champions ngoLwesibili.
AmaProteas ne-Australia bazobhekana kulo mdlalo kaGroup B ozoqala ngo-11 ekuseni eRawalpindi Cricket Stadium, ePakistan.
Iqembu lakuleli liqumbe phansi i-Afghanistan ngama-run angu-107 kowokuvula ngoLwesihlanu. Kulowo mdlalo likhethe ukubhetha kuqala, lashaya ama-run angu-315 kuma-over alo angu-50, selilahlekelwe amawikhethi ayisithupha.
URyan Rickleton uhambe phambili ngama-run angu-103 emabholeni angu-106, esizwa ukaputeni uTemba Bavuma oshaye ama-run angu-58 kanye noRassie van der Dussen beno-Aiden Markram abashaye ama-run angu-52 ngamunye.
Abashwibi bamaProteas bathathe izintambo bayiqeda i-Afghanistan isashaye ama-run angu-208 kuphela kuma-over angu-43.3.
URabada uthathe amawikhethi amathathu, wakhipha nomdlali oyedwa nge-run out. ULungi Ngidi noWiaan Mulder bathole amawikhethi amabili emunye, kwathi uMarco Jansen no-Keshav Maharaj bathola eyodwa.
URabada uthe nakuba amaProteas engazange ayithole imiphumela emihle ngaphambi kwalo mqhudelwano, bangene kuwona bezethemba.
“Besingakhathazekile. Uma siphelele siyakwazi ukuhlangana futhi umehluko uyabonakala eqenjini. Akungimangazanga ukuthi sidlale ngaleya ndlela. Besizimisele futhi siyethemba ukuthi sizoqhubeka ngendlela efanayo kuze kuphele lo mqhudelwano,” kusho uRabada.
I-Australia ivule lo mqhudelwano ngokuguqisa i-England ngamawikhethi amahlanu. I-England ibhethe kuqala yashaya ama-run angu-351, i-Australia yakwazi ukufinyelela kuma-run angu-356 kwi-over ka-48.
UJosh Inglis ushayele i-Aussies ama-run angu-120, kwathi uMatt Short no-Alex Carey bathole angaphezu kuka-60 umuntu ngamunye.
Abashwibi be-Australia ababe yingozi kulo mdlalo kube nguBen Dwarshuis, Adam Zampa noMarnus Labuschagne owazalelwa kuleli.
“Ngicabanga ukuthi i-Australia izoba yinselelo ehlukile. Inabadlali abangcono ababhethayo, ngakho-ke kuzomele sisheshe sikwazi ukumelana nesimo senkundla esizobe sidlala kuyona,” uqhube kanje uRabada.
“Komunye wemidlalo ye-TriSeries sishaye ama-run angu-350 kodwa sahlulwa. Lokho kusho ukuthi kufanele sihlakaniphe uma sishwiba. Ngabe lokho kuyasethusa? Cha. Lona omunye umdlalo okufanele sikhombise kuwona izinga lethu eliphezulu.”
AmaProteas anqobe imidlalo emine kwemihlanu yokugcina ye-ODI ayidlale ne-Australia. Nokho, kowokugcina we-ODI ababhekana kuwona okwakungowandulela owamanqamu eNdebeni yoMhlaba eyayise-India ngoNovemba ka-2023, i-Australia yanqoba ngamawikhethi amathathu.
Related Topics: